Мехкада: Тахан вай баь хоржам, гӏулакхашца бакъбе беза цар
Гӏалгӏайчен кулгалхочо Келаматанаькъан Махьмуд-Ӏаьлас дакъа лаьцар Россе Паччахьалкхен Думан, республикан Халкъа Гуллама депутаташ хоржаш, Шолжа-Шахьаре кхадж тоссача моттиге. Республикан Кулгалхочо белгалдир; моттигерча берригача бахархой машар, цхьоагӏо, чӏоагӏо хилара, керда экономически хьал дегӏадара тӏехьа ший оаз дӏаеннай, аьнна. Хоржамий даькъ тӏа республикан Кулгалхочунца бар Россе Турпал яха цӏи еннача кхаь бӏухочун Шолжа-Шахьаре баха кхоачара нах, уж бар карарча хана паччахьалкхен доазонаш лорадеш латтача Хьоашаланаькъан Ювсапа Султана, иштта тӏем тӏа шоай декхар кхоачашдеш бейнача Хьоашаланаькъан Адама Султана, Тӏумхой Руслана Хьасана дай.
«Шолжа-Шахьара из лаьрххӏа йола исторе оагӏув я. Шахьара пхе сага Россе Турпал яха цӏи елар. Царна юкъе ва Къоастой Абукар, са зӏамагӏа вола воша Келаматанаькъан ӏалихан. ӏалихан велар 2007 шера тов бетта 17-ча дийнахьа ший балха декхар кхоачашдеш, цун Россе Турпал яха цӏи елар. Вай Турпалхоех бола дагалоаттам - из Шолжен истори хинна ӏац. Из ерригача Гӏалгӏайчен истори да. Вайна дагабоагӏа Россе турпалхой Хамхой Адам, Боканаькъан Мустафа, иштта кхы дуккхабараш. Уж байра Даьхен духьа. Хӏара цӏера тӏехьа сага вахар, цун дезал, даьй, бераш, гаргара нах ба. Цудухьа таханара ди, хӏара сага ший граждански декхар кхоачашдеш дола ди да. Цо таро лу вай турпалхой дезалашта уллув хила тахан, царца из ди декъа, царна цӏаькха а хьалхадаккха: тхона дагадоагӏа, тхо уллув да, тхона дицлуш дац», - аьлар Келаматанаькъан Махьмуд-Ӏаьлас.
Республикан Кулгалхочо белгалдир, керттера декхар Гӏалгӏайче дегӏайоалаяр, иштта кхувш йоагӏача тӏехьен кхоане тоаяр да. Цо аьлар, тахан кхадж тосса ди - из хьалхара гӏа ба, хӏанзчул тӏехьагӏа бахархоша баь хоржам гӏулакхашца бакъбе беза.
