Мехкада: Терроризм яхача зулама е къам е ди бац
Тов беттацара 3-гӏа ди цхьа моллагӏа ди хинна ӏац… Россена из ди терроризм яхача доккхача, бӏехача зулама духьале лоаттаярца цхьанкхеташ ди да! Цхьаккха бехк боацаш, Берса-Юрта дайнача берий узам дагабохийташ, 2004-ча шера этта из унзара къемат цӏаккха а дегашта дицдала йиш йоацилга белгалдеш, ди да из! Наьсаре, Москве, Санкт-Петербурге, Буденовске, Волгограде, иштта кхыйолча моттигашка байнарий ноаной дегай човнаш, лазар чуэза ди да из. Цхьаккха бехк боацаш бӏехача, адамал шоай дегӏаца доацача наха вахар хоададаьраш дагалоацаш да вай.
«Республикера маьрша вахар лорадеш лаьттараш дагабох вайна тахан. 2004-ча шера аьтинга бетта 21-22 бус Гӏалгӏайчен доккха зулам дир террористаша. Наьсарерча, Илдарха-Гӏалий тӏарча, Сипсой-Гӏалий тӏарча ӏаьдала моттигашка чуйийттар цар. Милице, ФСБ, прокуратуре болх беш хиннараш, пограничникаш, иштта маьрша нах байра цу бус. Терроризм яхача бӏехача зулама духьале еш, 500 гаргга ӏаьдала болхло веннав вай мехка. Из дицде бокъо яц вай цӏаккха! Эггара халагӏа йолча хана, мохк лорабе ураэттараш бовзаш ба массанена. Деналца, майралца духьаллаьттар уж, къаман маьрша вахар лорадеш. Тахан чӏоагӏа лоархӏаме да цар дезалашта уллув хилар, оагӏув хьаллацар. Тахана а терроризм, экстремизм яхача зулама наькъаш тедаш къахьегаш ба мехка, царех цхьабола болхлой тӏема операцена юкъе дакъа лоацаш ба. Мехка хӏама лорадеш латта денал дола къонгаш ба уж! Вай массане кхетаде деза, маьрша вахар, паргӏато малагӏча маьхаца кхаьчай», - аьлар вай мехкадас Келаматанаькъан Махьмуд-Ӏаьлас.
Республикан Кулгалхочо белгалдир, терроризм яхар къам, ди боацаш зулам долга! Наьха вахар толхаде, цхьоагӏо, барт бохабе леладеш хӏама да из. Цудухьа цу бӏехача гӏулакха духьале лоаттаяр керттерча декхарех да тахан, къона тӏехье хӏара денна из хьалхадоахаш ураоттае еза вай.
Терроризм кхерамга гӏолла вай дохаде гӏерт, хӏаьта вай тахан кхетаду, цхьоагӏо, харцача хӏаман духьала барт болаш хилар эггара керттерчарех долга! Вайга массанега кхоачаш, юкъара хӏама да из – зуламе хӏама дохадар, цунна духьала къовсам лоаттабар. Унзарча гӏулакхо, цхьаккха бехк боацаш, вахар хоададаьраш дагабох вайна тахан… Зуламхой наькъаш тедаш, уж гучабахара тӏехьа къахьегаш, харцо чакхъяргйоацилга дӏахайташ, латта дезаш да вай тахан!
