Сочерча библиотеканна дӏаделар, Гӏалгӏайченах дола книжкаш
Краснодарерча юкъарча «Вайнах» оалача къаман культуран моттига хьалха латтача Малсаганаькъан Аюпа Сочерча библиотека болхлошка дӏаделар Гӏалгӏайчен культурах, исторех дола книжкаш. Из болам хетабаь бар Россе къамий цхьоагӏон Шера, Гӏалгӏай паччахьалкхе меттаоттаяь 34 шу дизара.
«Курортий шахьара бахархошта, хьаьшашта гӏалгӏай культураца, истореца, ӏадаташца дувзаденнараш довзийташ да из литература. Адлерски кхален библиотекашка хӏанзолца вай къаман авторий книжкаш хиннадац. Библиотеке къахьегараша, чӏоагӏа раьза болаш, дӏаийцар вай къаманца, мехкаца дувзаденнараш довзийташ дола уж книжкаш. Культуран оагӏонцара бувзам чӏоагӏбеш хиларах доккха баркал аьлар цар цу гӏулакха хьалхаэттарашта», - дийцар «Сердалога» Малсаганаькъан Аюпа.
Кавказа культуран тӏехьале, вай къаман йоазонхой литература довза аьттув ба хӏанз Сочерча библиотеке ухача наьха. Белгалде деза, иштта болча боламо Россе къамашта юкъера барт, бувзам чӏоагӏбелга. Боккхача мехка дахача дукхача тайп-тайпарча къамий гӏулакхаш, ӏадаташ, культура, тхьоврара, таханара истори довзийт иштта болх дӏакхахьаро.
