Шолжерча ДК болхлоша могашал яйнача берашта совгӀаташ дир
Шолжерча культуран Цӏен болхлоша бокъонца дола цӀай дир Эбарга-Юртарча берий цӀагӏа-интернате дешаш долча могашал эшаеннача берашта. Кердача шерара цӀай дездеш, берашта дега йӀовхал яла цига баьхкар артисташ, культуран Цӏен болхлой.
«Из кхетаче хоза дӀайихьар. Бераш чӀоагӀа раьза дар Гӏор-Дадена. Артисташа, дӀайхача дешашца, бегашца, цӀай хилара кепаца гӀаддигар цигара бераш, бокъонца дола тамашийна дуне хьакхеллар царна гонахьа. Фаьлгашка нийслуш дола сийрда дуне дар берашта гуш хиннар, тайп-тайпара бесаш долча тӀабувхача гӀирсо, халхараша, яхьаша, иллеша дегаш гӀоздаьхар цар. Хӏара бера кхаьчар шийна лаьрххӀа дола совгӀат, уж кийчдаьраш бар культуран Цӏен болхлой. Эггара чӀоагӀагӀа берашта дезаденнар дар, шоай боккхагӀа болча нахаца хинна къамаьл, цига вӀашагӀдехка ловзараш, цу юкъе шоаш дакъа лаца таро йолаш хилар», - аьлар «Сердало» газетага культуран-салоӀама моттиге.
Кӏеззига яь а, терко йича берашта деррига гонахьара дуне хувцалу. Шолжерча культуран Цӏен болхлоша шоай масалца гойтар, Керда шу – из эшачунна ший дега йӀовхал яла еза ха йолга.
