Магӏалбика бахархоша, вахтанговцаша Этуш Владимир дагалаьцар
Магӏалбика тӏема сийлен шахьаро безаме тӏаийцар Вахтангов Евгене цӏерагӏча Паччахьалкхен театра викалаш. Цох хилар лоархӏаме кхетаче, цо вӏашагӏтехар Кавказа турпала шераш, сий дола театральни искусство. Къаьстта укхаза, Магӏалбика лаьтта, Сийлахь-боккха Даьймехка тӏом латташ, денал гойташ латаш хилар цӏихеза советски, российски актёр, СССРа халкъа артист Владимир Абрамович Этуш.
«Гӏалгӏайче баьхкача викалашца вар Е. Вахтангова цӏерагӏча академически Паччахьалкхен театра кулгалхо Кирилл Крок, Владимир Абрамовича фусам-нана, сийдолча артиста дагалоаттам лелабеш йола Этуш Елена, Этуш Владимира ший мел дола вахар дӏаденнача цӏихезача театра артисташ, иштта Владикавказа «Вахтанговар Цӏа» яхача культурни центра болхло Кимераева Гурия», - аьлар «Сердало» газетага Магӏалбик-Шахьаре.
Магӏалбик цӏихеза я, Кавказе лаьтта тӏема хьал, моастагӏа тӏа ца кхоачийташ, дохадаь хиларах. 1942 шера укхаза бирса тӏом лаьттар. Цу хана, моастагӏчунна духьала латаш, денал гойтарех вар Этуш Владимир. Магӏалбик лораеш цо гойтача деналах, миллионаш болча наха везаш волча турпалхочунна Цӏеча Седкъа совгӏат делар. Цул тӏехьагӏа дукха ха яьлча, Владимир Абрамовича Магӏалбик-Шахьара Сийдола вахархо яха цӏи елар. Цун цӏерагӏа ба Магӏалбикан цхьа урам.
Уж хьаьший вайцига хьалхара баьхка цахилар боккха лоархӏам болаш дар. Шахьара бахархоша, кулгалхоша уж безаш тӏаийцар.
