ЕГЭ хало ца а лоархIаш, аьттув лархIар
Иштта къамаьл дир дешархошка, цар даьшка, ноаношка дешареи Iилманеи министерства кулгалхочо, Боканаькъан Эсета
В Министерстве образования и науки Республики Ингушетия прошла пресс-конференция, посвященная вопросам, связанным с организацией и проведением ЕГЭ-2022. С представителями масс-медиа встретились глава министерства Эсет Бокова и сенатор Мухарбек Барахоев, являющийся председателем Государственной экзаменационной комиссии.
«Сердало» газета дIайихьача мониторинго хьахьокх, хьехархой сагота болга, ЕГЭ юкъе хиннарашта 2021 шера доагIа ахча хьацадаларах.
Цу юкъе дувцаш-м 2019, 2020 шераш а да. Из хаттар делар, пресс-конференце, корреспондента министра.
Боканаькъан Эсета аьнначох, цу гIулакха мел доагIа ахча хьехархошта дIаденнад, цхьан бахьанца из дIацакхоачаш бисараша шоай хIама тахка дез цунга, министрага гIолла.
Белгалдир, цу гIулакха дола дош, ше чехка тохкаргда аьнна. Укх шера доагIаш дола ахча дIадала лерхI цхьан бетта. Боканаькъан Эсета гулбеннарашка дийцар, ЕГЭ юкъе цхьацца хувцамаш да аьнна.
ХIаьта, царех цхьаццадараш бераши, цар даьй-ноанойи гIадбугаш да. Сочинени хIанзчул тIехьагIа бераша шоай ишколе язъергья, арабовла ца безаш, иштта хувцам юкъебенаб.
Доккха дика да из берашта. Цул совгIа, хьалха хиннача бесса, аттестат хьаэцара юкъе базови математиках йола экзамен хургья. 9 класс яьккхарий, яла езача экзаменах дийцар Эсета.
Цар яла еза математика, эрсий мотт, кхы а ши предмет, шоай лоIаме харжа ют. Могашал эшаеннача берашта лаьрхIа а керда хувцамаш да.
Экзаменационни комиссе кулгалхо волча БIархой Мухарбика дувцачох, обществознанех, исторех язъеш хинна сочинени юкъера яьккхай. Цу гIулакхо совъйоаккхаргья экзаменашта лаьрхIа ха.
Цул совгIа, базови, математика юкъера хала заданеш хийцай аттагIчарца. Шоашта дагадоахка хаттараш делар министра къонача журналисташа. Уж ба Назранерча телевидене дIахьоча «Дети устремленные в будущее» яхача передача доакъашхой.
Къона журналисташ сагота бар, экзаменаш дистанционно яла йиш йий яхаш, цул совгIа, могаш воацачо мишта яла ез аьнна хаттар а дир.
Берашка дикка ладийгIа, Боканаькъан Эсета дийцар, могаш воацаш висачоа, дистанционно, из яла йиш йола бокъо юкъе йоалаяьяц аьнна. Белгалдир, цу хьале нийсвенначо де дезар — экзаменах вола йиш ца хилар хьагойташ йола справка IотIайила, каьхат язде деза экзаменационни комиссега.
Цар хоадам бергба, тIехьагIа, цо экзамен лургьйолча ден.
Пресс-конференци чакхъйоалаш министра даькъала бийцар дешархой, хьалха даьккхар, ЕГЭ хало ца а лоархIаш, аьттув лархIа аьнна.
ЕГЭ дика дIаенначун, Россе моллагIча вузе дIаотта йиш хилар, доккха дика долга теркалдир.
