Келаматанаькъан Махьмуд-Ӏаьлас тӏахьийхар, СВО бӏухой дезал цахаддаш хьаллацара
Республикан Паччахьалкхен кхетаче йолаш Гӏалгӏайчен кулгалхочо Келаматанаькъан Махьмуд-Ӏаьлас белгалдир СВО доакъашхой йоакхо яр ӏаьдала болхлой хьалхара декхар да, аьнна. Цо иштта хьалхадаьккхар бейнача бӏухой дезалашта, цахаддаш, массадолча боарамашка новкъостал лоаттаде дезилга.
«Оаш кхетаде деза, цу фусамашкара хьал даим миштад ховш хила дезилга, царна фу эш хьожаш, малагӏа хаттараш кхоачашде деза хьожаш хила деза. Россе президента массайолча органашта хьалхашка декхар оттадаьд къаьстта терко лоаттаяр лаьрххӏача операце бӏухошта, цар дезалашта. Из новкъостал цкъа даь ӏе йиш яц, хӏара денна, массайолча оагӏорахьа хила деза из, республикагара доал деча даькъ тӏа кхаччалца. Ший декхар кхоачашдеш мел вар лархӏа веза. Хӏаьта бейнарий дезал - уж турпалхой дезал ба. Вай царца къаьстта хила деза; баркал оалаш, лоархӏаш, фу эш хьожаш. Из вахарца бувзабенна болх хинна ӏац, из вай эхь хилара, нах хилара хаттар да», - аьлар Келаматанаькъан Махьмуд-Ӏаьлас.
Лаьрххӏача операце доакъашхошта терко лоаттаяр паччахьалкхен керттера декхар да, аьнна, белгалдаьккхар Гӏалгӏайчен Кулгалхочо. Цо яхачох, юкъарлоно бӏухой лоархӏаш хиларо хьагойт вай Даьхенцара безам а. Из да керттера декхар.
