2026-ча шера кхоачашде деза декхараш белгалдир Шолжа-Шахьара мэра
2026-ча шера дӏабахьа безача балхах дувцаш, кхетаче дӏайихьар Шолжа-Шахьара мэр волча ӏумаранаькъан Аслана. Из хоам «Сердалога» бир мэре зарбан болх лелабеча Батиганаькъан Хьавас.
«Бахархошкара интернета оагӏонашка, керттерча канале гулденна хаттараш тохкаш, укх шера кхоачашде дезача лоархӏамеча декхарех дувцаш йолча кхетаче дакъа лаьцар шахьара даь гӏончас, иштта мэре кхыболча болхлоша. Шахьара таханарча хьалах дийцар цига. Дӏахойодача хана де дезараш тӏадаьхкар хӏара болхлочоа», - йоах тхога бенача хоамо.
ӏумаранаькъан Аслана тӏадиллар, лаьттан доазош каралоацача, йоалаца дувзаденнача, иштта кхыдолча гӏулакхашта тӏахьожам чӏоагӏбе, аьнна.
Шахьара дас белгалдир, ерригача тоаба болх боаггӏача боараме дӏахьойя, 2026-ча шерара декхараш дизза кхоачашде аьттув баргба, аьнна, Даьла къахетамца.
