СоагӀапчара №8 йолча ишколе дӀайихьар экстремизма духьалара кхетаче хилар
СоагӀапчара №8 йолча ишколе дӀайихьар хьехама кхетаче, из хетаяь яр экстремизма духьале яра долча хаттарашта, иштта дешархой бехктокхам цу даькъ тӀа лакхбара. Цунна чудоагӀаш дар дешархошта экстремизма хьал дикагӀа довзийтар, уж цу ийрчача гӏозарех лорабар, цар машара тӀехьа йола уйлаш чӀоагӀъяр. Цига дакъа лоацаш хилар МагӀалбика кхален терроризмах йолча кхела даькъа кулгалхо Джамболатанаькъан Мухьмад, цу даькъа болхло Цӏечой Руслан, иштта дин викалаш Йовлой Хьажмурд, Фаьрганаькъан Хьусен.
«Дешархошца къамаьл деш, Джамболатанаькъан Мухьмада белгалдир: «ЛоархӀаме да кхетадеш хилар, моллагӀа дола бокъонашта духьале еш гӀулакх дӀадахьар унзара да цу сага шийна санна, цун цӀагӀарча наха а, гонахьарчарна а. Шун декхар - фийла, сакхетам болаш хилар, воча гӀозара тӀехьацадалар, Ӏехацадалар. Дина викалаша хьалхадаьккхар хӀара саг ше деча воча хӀаман хьалхара жоп дала дезаш хилар, цу деша кхоане лорае езар. «Цӏена дин леладеш волча сага ийрча гӀулакхаш дергдац, дино дӀадехар да, машара тӀехьа, нахаца лерхӀам болаш, сага вахар лорадеш хилар», - аьлар Йовлой Хьажмурда. Шоайла дика къамаьл хотталуш дӀабихьар из болх. Дешархоша а шоай хаттарш делар, царна довзаш доаца хьал ма дарра белгалдир, цун мах оттабир. Юххера а, кхетаче чакхйоалаш хьалхадаьккхар, нагахьа санна дегабуам бе йиш йолаш хьал шоашта нийслойя, мичахьа хоам бе беза», - аьлар «Сердало» газетага МагӀалбика кхален администраце зарбан болх лелабераша.
№8 йолча ишколе дӀайихьа кхетаче цӀаькха а чӀоагӀдеш яр кагирхошта юкъе во гӀулакхаш цадаржийтара хьал. Цо дика хьалхадоаккх берашта хӏанзалца довзаш цахиннар, цул совгӀа, паргӀата дӀадихьача къамаьло вахарца хьакхаштабоах уж, цигара довзаш хул харцахьдар, нийсагӀдар. Цар дикагӀа уйла тӀайохийт шоай дӀахо леладе дезачоа.
