СовгӀаташ дӀа-юха луш, болх дӀабихьар «ХӀарма» яхача кхетаче
«ХӀарма» яхача кхетаче дакъа лоацаш хиннача моттигаша, шоайла совгӀаташ телаш, хоза гӀулакх гойтар. 2023-ча шера кхетаче дӀайихьача Самарски областа моттигаш гойташ дола сурт делар вай Мехкадаьна Келаматанаькъан Махьмуд-Ӏаьланна Юкъарча палатан доакъашхо волча Покровский Павла.
Самарски областе дикка ха яьккхача, Куйбышеверча паччахьалкхен университете дешаш хиннача вай Мехкадас геттара лоархӀаме совгӀат лаьрхӀар цох. Самаре прокурор волаш, эколеген гӀулакхех йолча моттигашка болх беш хинна ханаш дагаехар республикан Кулгалхочунна. ЧӀоагӀа тамашийна, массавар цецвоаккхаш хӀама да, из сурт дилла Тольяттера суртанча Коробских-Кудашов Евгений шаккха кулг доацаш, халача хьале эттачул тӀехьагӀа, царгашта юкъе къоалам, кхыбола сурт дуллаш лелабу гӀирс лувцаш, дӀахо болх беш хилар.
Покровский Павла ший къамаьла юкъе белгалдир, Россе къамашта юкъе бувзам, цхьоагӀо, барт хилар, культурацара Ӏадаташ хьаллацар тахан чӀоагӀа лоархӀаме долга. Иштта цо тӀатехар, вай республикан культуран оагӀонцара проекташ йоаржаяра тӀехьа дикка къахьегаш хилар; хӀаьта из, дуккханешта масал да. Вай дерригаш цхьа барт кхеташ хиларо боккхача мехка кхоане сийрда, паргӀата хулийтаргья.
