«Росси» яхача гойтама ГӀалгӀайчен даькъ тӀа го йиш хилар, курхьарс мишта хьаю
ЦӀолой Зарема Республикан Йовлой К.А. цӀерагӀча халкъа кхолла цӀен кулгаговзал йола, вахаре эшаш хӀамаш хьаяра говзанча я. Из дакъа лоацаш хилар Москве дӀахьош йолча Ерригроссе «Росси» яхача гойтаме, культуран ди долаш. Цо цига бийхабар говзанч-хьехам дӀахьоча хьажа безам бараш, из хетаяь яр къаьнарча гӀалгӀай къаман кхалнаьха керта тӀа туллабеш болча курхьарс оалача гӀирса.
Кавказа культуран истори, гӀалгӀай къаман Ӏадат дезаш болча наха цу говзанч-хьехамах боккъонца дола совгӀат хилар. ЦӀолой Заремай йоккха говзал я кулгаговзалца беча балха даькъ тӀа, цо луш бола говзанч-хьехам а иштта боккхача безамах латташ бар, ший болх бовзаш а из безаш а хилар хьагойтар цо», - аьлар «Сердало» газетага ГӀалгӀайчен халкъа кхоллама цӀен кулгалхочо Котанаькъан Марема.
Ше говзанч класс дӀахьош, Заремас дийцар гӀалгӀай кхалнаха дукха шераш хьалха из гӀирс – курхьарс лелабарах лаьца. Цо белгалдир, из тӀатуллача кхалсага сибат хозлуш хиларал совгӀа, цунна ший кӀоаргга чулоацам а хиннаб.
Говзанч-хьехам дӀахьош, ЦӀолой Заремас гойтар курхьарсаш мишта хьаеш хиннай. Цига хиннача доакъашхой хӀаране таро хилар ГӀалгӀайчен йӀаьхийча этнокультурах хьокхабала, йовза.
