ГӀалгӀай къаман библиотеко «Кердача книжкай уйче» яха проект дӀайолаю
ГӀалгӀайчен Янданаькъан Джамалда цӀерагӀча къаман библиотеке дӀайолаеш я «Кердача книжкай уйче» яха проект, цо тӀахьех мехка бахархой, тӀехьарча хана арадаьннача мехктохкама литературан оагӀонаш йовзара.
«Тха библиотекан къаман-мехктохкама отдело из болх вӀашагӀбеллаб, ГӀалгӀайчен бахархошта юкъе исбахьлен, мехктохкама литература довзийта дагахьа. Цо таро хулийтаргья библиотеке ухача наха къаман исторе, культуран, хьамсарча мехка Ӏадатий оагӀонаш дикагӀа йовза. Иштта кагирхой а боккхагӀбарий а безам дешара тӀаозаргба цу гӀулакхо. Кердача книжкаша массаза гӀадвуг дешара тӀера вола саг.Тхо долча хьавеначунна, массахана корадергда шийна деза книжка, из лаха таро луш да укхаза хьагойташ дола книжкай мугӀараш», - аьлар «Сердало» газетага ГӀалгӀайчен къаман библиотеке.
«Кердача книжкай уйче» яхача проекта чудоагӀаш, ГӀалгӀайчен исторена, культуран хетадаь керда книжкаш довзарал совгӀа, гӀалгӀай меттала яздеш болча наьха кхолламашца дувзаденна балхаш гургда царна.
«Кердача книжкай уйче» яха проект - из я ГӀалгӀайчен бахархошта лаьрхӀа дешара керда таро.
