«Сунт» яхача операцега гӏолла, наькъашкара бокъонаш телхаеш 220 моттиг гучаяьлар вай мехка
Мехкарча МВД хьалха латтача полице инарал-майор волча Котов Владимира тӏадилла, «Сунт» яха операци дӏахьош хилар вай республике.Полице, Росгварде болхлоша 217 машина, 226 сага гӏулакх тохкаш болх дӏабихьар цу дийнахьа. Цу гӏулакхо гучадаьккхар, наькъашкара бокъонаш ца лоархӏаш, 220 гӏалат хиннилга.
«Из операци дӏахьош, эггара дукхагӏа нийслуш дола гӏалат машинаца тонировка хилар да. 61 саг бехктокхаме эзар из бахьан долаш. 29 машина тӏара тонировкацу моттиге ӏояьккхар полице, хӏаьта 9 саг каьхаташ доацаш машин лоаллаш вар. Наькъашкара бокъонаш телхаеш, каьхаташ доацаш леларах 11 машин цу гӏулакха къоастаяьча моттиге дӏайигар. Цхьацца бахьанех шоашта хьадетташ дола гӏод дӏатокхаш боацараш 26 саг вар», - йоах «Сердалога» МВД беча хоамо.
«Сунт» яха операци еш я, мехкарча наькъашкара хатараш ма хулла лаьгӏде гӏерташ. Из болх массахана дӏакхухьаргболаш ба мехкарча моттигашка. Машинаца араваьннар кхетадеш хила веза, ший санна гонахьарча наьха а уйла е езилга, наькъашкара бокъонаш цалархӏар иштта атта дусаргдолаш хӏама доацилга. МВД болхлоша кхайкарал ду бахархошка; боккъал а оашош хьоча наькъа уйла еш, сих ца луш, бокъонаш лораеш лела, яхаш!
