Наркотикаш йоаржаярах дола 561 зулам гучадаьккхар вай мехка 2023-ча шера
Наркомани яхача доккхача вон юкъе чудоаш дола 561 зулам гучадаьккхар 2023-ча шера вай МВД болхлоша. 2022-ча шера хинначул, 43,1% дукхагӀа хул из. «Сердало» газетага из хоам бир мехка кабмино.
«Республике дӀабихьар боккха болх хиларах, Ӏаьдало бехктокхаме эзав 248 саг. Москвера, Ставрополера республике наркотикаш лоаттаеш хинна наькъаш дӀакъайлад, 26 кийла совгӀа дола из дохьаж гучадаьккхад, 108 саг дӀаязваьв цу зулама тӀагӀолла. 2022-ча шера хинначул 52% дукхагӀа хул из», - белгалдир паччахьалкхенна кулгал деча Сластенин Владимира дӀайихьача кхетаче.
Цу оагӀон болхлоша белгалду, республике наркоманена духьала къовсам лоаттабар эггара керттера долча гӀулакхех долга. Кхыча моттигашкара хьачуухаш бола цу оагӀон зуламхой, вай мехкарча из бӀеха базар лелаерашца, кагирхой цу зулама юкъеоза гӀерт. Цудухьа из доаржадерашта эггара чӀоагӀагӀа дола таӀазар оттаде деза, цхьаккха къахетам боацаш, бехктокхаме оза беза деррига къам толхаде гӀерта зуламхой.
