Вай мехка саг вийна зулам тӏатеттар Краснодарера хьалаьцар
Магӏалбика кхален юрта лаьттача машина чу вийна ваьгӏача сага из ди тӏаоттадаьр ӏаьдала болхлоша лаьцар. 51 шу даьнна зуламхо Краснодаре гучаваьлар. Из хоам «Сердалога» бир тохкама оагӏон болхлоша.
Укх бетта 3-ча дийнахьа Магӏалбика кхалерча Заьзгакъонгий-Юрта латташ хоаелар вийна саг чувагӏа «ВАЗ 2110» машин. Наькх тӏа герзо яь човнаш йолаш, тӏехьашкахьарча гӏанда тӏа иллав саг. РФ УК 1-ча даькъа 105-ча оагӏонах (саг вер) гӏулакх хьадийллар вай мехкарча тохкама оагӏон болхлоша.
Россе МВД СУР «Магӏалбик» яхача МО болхлоша, вай мехкарча Россе МВД УУР къахьегамхоша дӏабихьача балхах, зуламхо гучаваьлар. Краснодаре ведда дӏаваха из ӏаьдало хьалаьцар.
Магӏалбикерча тохкама моттиге хьавоалаваь, болх дӏахьош да цунца ӏаьдал. РФ УПК 91-92 оагӏонаша дӏадехача беса лаьцав. Тохкама болх дӏахьош, ше даьча зулама дари даьд цо. Из гӏулакх дӏахо тохкаш латт.
