ЦӀечой Дейси - моттигерча «Волонтёрий-лорий» отделене кулгалхо, кагирхой Российски союза вайцигара викал.
Тха турпалхо, деша ягӀача хана денз, юкъара болх лелабеш хиннай. Лорий факультете студентка йолаш, цо шийна гонахьа хьинар долча волонтёрий дика тоаба гулйир. Шийна гонахьарчарца цхьана цунна карагӀдаьлар волонтёраш-лораш цу дакъ тӀа дийшараш мара хила йиш яц яхар бакъдоацилга дӀагойта.
Юкъара гӀулакх дӀахьош, из лорий болх Ӏомабаь Ӏанзар. Тахан из чуйоагӀаш я ГӀалгӀай Республике гӀолла йолча Российски кагирхой союза эггара чӀоагӀагӀа хьинар дарий тоаба.
Дукха ха я, цо шийна гонахьарчар тешам боа ца беш, массане гӀонча йолаш, цу даькъ тӀа къахьега.
ХьатӀадоагӀача шера лорий специализаци е езаш я из, ординатуре дешаш.
2024 шера Дейси котъяьлар «Шера студент. Лораш» яхача Ерригроссийски яхье. Юххьанца котъяьла цун дага хиннадеце а, цо гойта «Лорий гӀулакх» яхача даькъ тӀара ший балха говзал лакха хилар.
Ший балха тӀа эггара лоархӀамегӀа цунна хетар да, хьалхара новкъостал дара говзал наха Ӏомаяр.
Волонтёраш-лораша вӀашагӀбеллаб ишколай, сузий, вузий, доалахьарча а паччахьалкхен а цхьанкхетарий даькъ тӀа дика дешар дӀадахьара болх.
