Москверча Гӏалгӏайчен массазарча викала балха новкъосташа Даьла духьа дӏахьоча болама юкъе дакъа лаьцар
Къам мехкахдаьккхача денна хетабаь болам хьаллаьцар Москверча вай мехка викала балха нокъосташа. Цу доккхача, унзарча хатара юкъе байнараш дагалоацаш дола из гӏулакх доаржадир, вай мехкадас Келаматанаькъан Махьмуд-ӏаьлас тӏадилла. Гӏалгӏай къамо цу шерашка текхар йоккха хало йолга дагалоацаш, гӏо эшарий Даьла духьа оагӏув хьаллоацаш да из. Къаьстта терко йир Москве бахаш болча вай къаман дукха бераш долча дезалашта.
«Тайп-тайпарча кхачан тӏормигаш дийкъар царна. Хьоар, шекар, худараш, даьтта, чай, мерза даараш дар мехкахошта дийкъача тӏормигашка», - дийцар «Сердалога» бувцаш болча болхлоша. Москве из болам дӏабахьаро хьагойт, 1944-ча шера къаманна тӏакхелла харцо, текха ӏазап цӏаккха а дицлургдоацилга, гӏалгӏай бахача моллагӏча моттиге из массахана дийна хургдолга.
Мехкал арахьа бахарашта лоархӏаме да из гӏулакх, къаьстта лоархӏаме да кхувш латтарий вахаре. Даьла духьа бола из болам хӏара шера дӏакхухьаш ба. Селханара истори дийна долга, тахан мискача наьха оагӏув хьаллаца безилга белгалду цу гӏулакхо.
