Москверча ГIалгIайчен викалаша дика болам дIабихьар
Российски Федераце Президента чуйоагIача массазарча ГIалгIай Республикан викала фусаме дикача гIулакхий болам дIабихьар: сагIа даьккхар 1992 шера хатар хинна Ди дагалоацаш, цига бейнача наха тIера.
Болам доккха маIан долаш бар - сагIа даккхарца, дика гIулакхаш дарца дагабехар цу хатара юкъе нийсбеннараш, тахан новкъостал эшаш бараш хьаллаьцар.
«Цу программанна чудоагIаш, массазарча викала балха новкъосташа Москве, Московски областе бахача наха хьалхарча аргIагIа эшаш дола новкъостал дир кхачан продукташца», - аьлар «Сердало» газетага из болх вIашагIбеллараша.
СагIа далар – из материальни гIо деш хилар хинна Iац, из да тIехьара тIа гIалгIай Iадат белгалдеш хилар, бусалба наьха къахетам шоайла хьаллоацаш хилар, лархIар, юкъарлонца хоза гIулакх хилар.
Москвера викалаш хьежар хIара гIалгIай дезалашта дIакхачийта терко, йIовхал. Дукхача дезалашта, уж иштта хьаллоацаш хилар доккха новкъостал да; цул совгIа, шоаш биццабарах йола терко а я.
