ДӀандарг эккхаш лозаваь хиннача кӀаьнка, Москве дӀахо дарба дергда
29.09.2023 14:02
ДӀандарг эккхарах йоккха чов хинна 14 шу даьнна кӀаьнк, Москве дарба де аьнна дӀавигав. ГӀалгӀайче ший ханнахьа эшаш дола лорий новкъостал даьчул тӀехьагӀа, лаьрххӀача фецарча кемаца столице дӀавигар из. «Сердало» газетага моттигерча унахцӀенон министерстве аьлар; Москве из дӀавигар дика чакхдаьннад, аьнна.
«Вай лораша цу бера эшаш дола лорий новкъостал даьдар. Лораш шоайла дагабаьнна, ГӀалгӀайчен Кулгалхочун администраце, паччахьалкхено новкъостал даь, Россерча берий клинически дарбанче дӀавига лаьрхӀар из. Оаха Москверча лорашца бувзам лелабу, бера могашал миштай хьожаш. Из хатар нийсденна дезал хьаллоацаш а, цун хьал довзаш а да, тхона лов из сихагӀа вийрза цӀавар», - аьлар ГӀалгӀайчен унахцӀенон министра Антошканаькъан Заремас.
