ГӏалгӀайчен Паччахьалкхено тӀахьожам чӀоагӀбу кхачан маьхашта
Бувзама оагӏонашка гӀолла наха дувца даьккха кхачан даарашта маьхаш тӀакхийттад яха дош бахьан долаш, ГӏалгӀай Республикан Паччахьалкхено лаьрхӀар, аргӀанара боаца тӀахьожама болх дӀабахьа. Хьалхарча вице-премьера Йовлой Мухьмада, мехка Кулгалхочо тӀадиллача декхарах из болх мишта латт хьажа лаьрхӀар Наьсаре, цунца цхьана хилар цу гӀулакха йолча министерствай, мехка доал дара Центра, моттигерча администраце, иштта моттигера Россе ФАСа викалаш.
Тӏахьожама болх дӀахьош, хьалхарча аргӀагӏа тахка таро хилар дулха продукцена, дӀахо баьцадаарашта, кхыдолча вахаре лоархӀамеча товарашта маьхаш лакхдаьдий. Йовлой Мухьмада къамаьл хилар эцаш а йохкаш а хиннача нахаца. Цар тешал дир вай республике кхачана продукце маьхаш дуккха а лохагӀа хилара, кхыча республикашка долчул.
«Тха керттера декхар да - эггара чӀоагӀагӀа эшаш долча даарашта мах тӀацакхетийтар. Оаха каст-каста из болх дӀахо дӀахьоргба, маьхаш гуш-довзаш хургдолаш», - аьлар Йовлой Мухьмада.
