Вай мехка из яьржа спорта оагӀув я, Россе йоккхагӀа йола дешара-спортивни проект я «Самбо ишкол», из болх беш я мехка 77 моттиге. РФ Президента Путин Владимира «Самбо ишкол» яха паччахьалкхен проект кулг яздарца чӀоагӀйир. Дика хетаргдар сона, кагирхой цу спорте дукхагӀа дакъа лоацаш хуларе, цо таро хулийтаргьяр дикагӀа унахцӀено йолаш дегӀааха, кхерамзленна Ӏалашо а хургьяр, оамал а чӀоагӀлургьяр», - аьлар ТӀумхой Мухьмада, ше къамаьл деш.

Белгалду, лайчилла бетта 12-ча дийнахьа ТӀолданаькъан Рустама Ереване дӀахьош хиннача самбо дунен чемпионате дошо майдилг яккхар. Из кхоалагӀа дошо майдилг яр, цо дунен чемпионате йоаккхаш хиннар.

НачӀал дола спортсмен вахаш а ший говзал дегӀайоалаеш а ва Санкт-Петербурге, цунна кулгал деш ба Россе цӀихеза тренер Коршунов Александр, халкъашта юкъерча класса спорта мастер ТӀолданаькъан Адам.

ГӀалгӀайче цу тайпара спорт дегӀайоалаяр дийцачул тӀехьагӀа, ТӀумхой Мухьмада чемпион даькъалавийцар цун коталонца, хьаьшашта Халкъа Гуллама сийлен грамоташ елар, кагирхошта Даьхенцара безам совбоаккхаш кхетам баларах.

Хьалха «ЦаӀ йола Росси» яхача парте «Zа самбо» яха проект араяьккхаяр 2022 шера кӀимарса бетта. Цунна керте вар самбо Ерригроссе федераце президент Елисеев Сергей. Юкъарча совета председатель вар «ЦаӀ йолча Россе» Генсовета секретарь Турчак Андрей.

Из лаьрхӀа я самбо, Даьхен спорта оагӀув а российски культуран дакъа а санна дегӀайоалае. Самбо хӀара шера спорта оагӀув санна, дукхагӀа яржаш йоагӀа Россе шахьарашка, юрташка бахача кагирхошта юкъе а иштта кхыча дуккхача паччахьалкхенашка а.