Наьсарерча дешархошца, кхетаче дӀайихьар дийшача наха
Дийшача наха Мержой Адама, Малсаганаькъан Мухьмада кхетаче дӀайихьар, Наьсарерча №4 йолча ишкола 8-11-ча классашкарча дешархошца. Из хоам тха «Сердало» газетага бир ишколерча болхлоша.
Дийшача наха берашта хьалхадаьккхар, мел лоархӀаме да хӀара сага вахаре нийса, цӀена никъ лелабар, харцача хӀаманна юкъецаахар. Геттара кӀоарга дийцар, интернете гӀолла дувлача зуламех. Эхь, эздел лорадеш, боккхийчар сий деш, цар яхачунга ладувгӀаш дӀадолхе, харцача наькъ тӀа даргдац шо, аьнна, хьехам бир Мержой Адама.
Къаракъи наркотикаши Дала цхьатарра хьарам лаьрхӀа, саг ше леладечох тувлавеш, зулам долгах дийцар цар. Даьла Элчах (Даьлера салам, моаршал хилда цун) яьхкача хозача оамалех дийцар берашта.
Белгалде деза, иштта дӀакхухьача кхетачеша кагирхошта боккха пайда лулга.
