Кагирхой комитета, Миннаца болхлой вахаре гӏо лоаттадеча Цӏагӏа хилар
Кагирхой гӏулакхех йолча Комитета хьалха латта Пхьошанаькъан Зоврбик, «Кагирхой цхьанкхетарий Цӏен» кулгалхочун гӏонча, Миннаца кулгалхочун гӏонча Хьаьшанаькъан Хьамзат «Къахетам» яхача вахара оагӏонцара гӏо лоаттадеча Цӏагӏа баха хилар. Цу моттига болхлоша терко лоаттаеш волча сага 34 шу дизарца дувзаденна дар уж цига кхачар бахьан. Оздой Мухьмадага дакъалавувцаш , цун оагӏув хьаллоацаш къамаьл даь, совгӏаташ денна , бӏарчча цӏай оттадир цар.
«Ишта кхетаченаш лоархӏаме я аьлча, харцахьа хургдац! Тахан гӏо эшаш, терко эшаш болча наьха дог ураоттадеш хӏама да из. Кагирхой паччахьалкхен оагӏонцара моттига доакъашхоша тахан шоай низ дӏа ма кхоачча теркалду из гӏулакх. Цар гӏулакхех йолча комитето доккха баркал оал цу юкъе дакъа лоацаш хиннарашта. Иштта дола беркате боламаш хьаллоацаш, лоархӏамеча проекташта кагирхой юкъебоалабеш хургда тхо дӏахо а», - дийцар «Сердалога» кагирхой гӏулакхех йолча Комитете.
Вӏаший къахетаме, дог лазаш, оагӏув хьаллоацаш хилар бусалба сага дегӏаца эггара лоархӏамегӏа дола гӏулакх да. Терко ераш, кулг хьакховдаде кийча бараш хилча, моллагӏа хало такха аттагӏа хул сага.
