Мордове дӀайихьача яхье, котбаьлар вай регбисташ
05.02.2024 10:41
Мордове дӀайихьача 12-13 шу даьннача кагирхошта юкъерча регбех йолча ерригача Россе яхье, шоллагӀа моттиг яьккхар вай «Лоаманхо» яхача спортсмений тоабо. Из хоам «Сердало» газетага бир спортахи физически культурахи йолча министерстве.
«Россе тайп-тайпарча моттигашкара регбех ловза маӀа нах а кхалнах а «Поволжски овал» яхача спорта турниро гулбаьбар. 24 тоаба яр, цига дакъа лоацаш. Йошкар-Олерча, Чебоксарерча, Самарерча спортсменашца гӀертар вай мехкахой. Пензерча «Локомотивацара» ловзар аттачарех дацар вай кагийча наха, бакъда цун чаккхе берригаш гӀадбугаш хилар.
Регбех волча керттерча вай тренера Циздой Ислам-Бека яхачох, «Поволжски овале» вайбараша майдилг хӀанз эггара хьалха яьккхай.
