Хьалхадоаккх, 87 кг дозал дола Йовлой Мухьаммад котваьлар, хIаьта Амринаькъан Алан, Iарапханаькъан Рамзан — геза совгIаташ даьха хилар.

Спортсменаша цига баьккха, Келматанаькъан Iалихана Мемориале хиннар санна бола толам, спортивни федераце доккха дакъа юкъедахьаш ба.

ХIаьта, укх наькъа, из ГIалгIайчен спортивни латара Федераци я. Цунна президента Белхарой Руслана турнира чаккхе ювцаш аьлар, цигача вай спортсменаша даьхача толамашта раьза ва ше аьнна.

«Йовлой Мухьаммада хоза латар гойтар, шийца латаш хиннарашта цхьаккха а таро ца юташ котбалара. Тешаш ва со цхьа дошо майдилг яьккха а Iийна хургбацар, цхьабакъда тактически дола гIалаташ юкъенийсдаларах, иштта хилар. Iарапханаькъан Рамзана нийсвеннар чIоагIа апонент вар-спорта говзал йола дуненна а, иштта Европа а котвалархо. Цудухьа геза майдилг цу тайпара дIайихьача яхьашка яккхар из мах болаш да», — аьлар Белхарой руслана.

«Турнир лакхача боарам тIа дIайихьар, доакъашхоша а, иштта хьаьшаша а шоай раьза хилар дитар цига. Уж яхьаш дIахьош оаха тхоашта могар дир: хьаьшашта а, иштта доакъашхошта а терко яра, царна лерттIа хьалаш хилийтара, цу мероприяте хьабаьхкарашта кхерамзлен Iалашо хилийтара.

Массанена а баркал ала ловргдар сона, цу тайпара дика уж яхьаш вIашагIйохкарах. Белгалдаккха лов РФ Паччахьалкхен Дума депутата Татренаькъан Муслима даь новкъостал, иштта цу юкъе дакъалаьцар: ГIалгIайчен спортивни латара Федераце хьалхарча вице-президенташа Ведажанаькъан Тамерлана, Ярыжанаькъан Iамархана, Янданаькъан Султана. Баркал ала лов, ГIалгIайчен спорта Министра Дошхьакълой Iаьла. Даькъал бувц тренераш а спорсменаш а!» — аьлар Белхарой Руслана.

Россе Турпалхочун Келматанаькъан Iалихана дагалоаттама турнир дIайихьар «Магас» спорта ЦIагIа, цига дакъалоацаш хилар 150 совгIа спртсмен, уж баьхкабар 40 мехка регионашкара а, иштта Беларусь Республикера а.