«Баьча соцамах, шаккха оагIоно вIаший гIо дергда, экономически хьал тоадара тIехьа. Цхьана дIакхахьа лерхI тайп-тайпара акцеш, кхетаченаш», — йоах тхога бенача хоамо. «Дог тийша ва со, вай яь чIоагIо, шаккха региона пайдане, беркате хургхиларах.

Цхьана кхетаченаш дIакхухьаш; бувзам, юкъера барт чIоагIлургба, вIаший довзаргда», — белгалдир вай Мехкадас, чIоагIо еча каьхаташта кулг яздеш. Балицкий Евгене аьлар, дукха ца говш, ГIалгIай мехка ва безам болаш; цигара хьал, гIулакхаш довза ловш ва ше, аьнна.

«Къамаш къестаду гIулакх юкъе доацаш, дуккха хIамаш дIа-хьа эцаш, юкъера бувзам чIоагIбеш дIадаха деза вай. Тахан Украине чукхеста латта, зуламе даьнна, къамаш къестадар юкъехошийта йиш яц», — аьлар губернатора. Балицке белгалдир, Запорожски областера бераш, дуккха къамаш дахача паччахьалкхе; вIаший барт, безам, лерхIам болаш даха дезилга гойташ; Россерча моттигашка гIолла чакхдаха безам ба шоай, аьнна. Журналистий хаттарашта жоп луш, вай Мехкадас дийцар, воккхача бизнесмена Гуцаранаькъан Микаила гIо деш, кастта республике хьаелла лерхI боккха лерхIам бола дешара проект. IТ оагIонца къахьегаш болча говзанчашта лаьрхIа колледж хьаелларгья республике. Цига кагирхошта хьехаш хургба, арахьара хьачубоалабаь лакха говзал йола хьехархой.