«Вай мехкаш хьалхагӀа а дешара оагӀув дегӀайоалаяра даькъе айхха бувзам лелабеш дар. ХӀанз кулг яздаро цхьаькха а таро лу, лоалахарча мехкашкара балха говзал хьаэца, из балха юкъейоалае», - аьлар «Сердало» газетага ГӀалгӀайчен Ӏилман, дешара министра Боканаькъан Аьсета. Цу кхетаче ГӀалгӀай, Нохчий, Къилбаседа ХӀирий дешара моттигий кулгалхоша дийцар, дешарца дувзаденна лоархӀаме дешаш. 

Хьалхарча аргӀагӀа дийцар дар ерригача дешара-хьехара куран тӀа дешара дикал лакхъяра дош. ДӀахо дийцар лакха говзал йолча балхах дика кхеташ бола, кердача дешара хьалашка болх бе ховш бола хьехархой кийчбарах. Цу даькъе лоархӀаме да Ӏилма-методически новкъостал, цахаддаш хьехархочун дешара оагӀув дӀаяхьар, цо ший оагӀорахьа таро хулийтаргья дешара дикал лакхъе.