Iадаташцара хоза гIулакхаш хьалхадоах вай дешархошта
«ГIалгIай Iадаташи, оамалаши» яха сайре дIайихьар Йоккхача Ачалкхерча № 17 йолча ишкола дешархошца, цу юртарча культуран цIагIа. «Дешархошта лаьрхIа культура» яхача проектага гIолла дIахьош, беркате болх ба из. Из хоам «Сердало» газетага бир МагIалбика кхален администраце.
Кхувш латтарашта дийцар, вай къаман сага леладе дезача эзделах, яхьах, гIулакхах. ХIара цIагIа дувцаш, хIара дезалхочо лорадеш, дIадахьа деза гIулакхаш да уж, хIана аьлча эхь, яхь дIадаьлча, сага сий дов, наха юкъе лоархIаш хилац. Цу ден тIа кхача безам боацар ший къаман сийдола Iадаташ, оамалаш лораеш ваха веза.
«Тха керттера декхар – вай кхувш латта тIехьа къаман хоза оамалаш йовзаш, боккхийчарца лерхIам болаш, вIаший гIо де кийча йолаш кхеяр да. Тхьовра денз, вай даьша лорадеш хьадена гIулакхаш довзаш хуле, ший сий, эздел лораде ховргда цун.
Берашта юххьанца дIадувца дезаш, лоархIаме хIамаш да уж», - дийцар из болх дIахьош хиннараша.
