Наьсарен дешархошта дагабохийтар тайп-тайпарча ханашка хинна турпалхой-мехкахой
Денала урок дӏайихьар, Наьсарен №23 йолча ишколе. Йоккхагӏча классашка багӏарашта дийцар Гӏалгӏайчен исторе керттерча турпала ханех – Сийлахь-боккхача тӏема ветераний турпала гӏулакхашкара дӏадоладаь тахан Даьхе лораеш латтарий деналга кхаччалца. Кхетаче хилар, «Цаӏ йолча парте» «Исторически дагалоаттам» яхача федеральни проекта чуйоагӏаш.
Берашца къамаьл де баьхка хилар парте моттигерча исполкома кулгалхо Кхоартой Ибрахӏим, моттигерча отделене секретарь Бохтаранаькъан Ювсап, депутаташ-единороссаш, республикан Халкъа Гуллама керда харжа оттабаь кандидаташ Къоастой Ваха, Чернышева Юлия, Местой Мухьмад.
Исторически дагалоаттам дӏаболалу доккхача къамаьлашца а боацаш, хоадам болча гӏулакхашца. Вай ба доаккхал де йиш йолаш нах, цудухьа лоархӏаме да вай тӏехьенна цар цӏераш йовзаш хилар. Осканаькъан Сулумбика, Келаматанаькъан ӏалихана, Хьоашаланаькъан Султана, иштта кхы дуккхабараша Даьхенцара безам гойтар. Вай декхар да из дагалоаттам лорабар, из кердача ноахалашца бахаш хургболаш», - аьлар «Сердало» газетага Кхоартой Ибрахӏима.
Цу денала уроках дешархошта дика майда хилар, ноахалаша дийна къамаьл шоайла дӏахьоргдолаш. Цо таро лу берашта книжкал арахьардар довза, боккхийчарца дагабала, сага карагӏдаьннараш довза. Цар дийцар тахан граждански бехктокхам хилар, Даьхе лораяр сийдолаш гӏулакх хиларах.
Къаьстта йола терко тӏаяхийтар Чернышева Юляс, дагалоаттам керадача ноахалга кхоачаш хила безара. Цо белгалдир, мехкахой дагалоаттам лорабар - из дӏаяха ханаш дагалацар хинна ӏац. Из исторически тӏехьале эшаш я кагирхой кхебара. Из накъадоал тахан дийша боалача вай кагирхошта, шоай хургбола вахара никъ къоастабара, оамал чӏоагӏъяра.
