Дешархоша «Хий - вахара хьаст» яха болам вӀашагӀбеллар
10.06.2024 12:58
Илдарха-ГӀалан дешархоша вӀашагӀбеллар «Хий - вахара хьаст» яха дикача гӀулакхий болам. Из дӀахьош, моттигерча 100 сага хьастара хий чудола шушаш елар, цу юкъе водителаш а болаш, яхаш, дийцар «Сердало» газетага «Берала никъ гойтар» яхача Ерригроссийски проекта зарбан болх лелабераша.
«Цу боламе доакъашхой бар Илдарха-ГӀалан №1 йолча юкъерча ишкола дешархой, царна керте латташ хиннар яр кхетам балара даькъ тӀара кулгалхочун гӀонча ЧӀасанаькъан Зура.
Кхетаче дӀаяхьара бахьан дар, кхувш йоагӀача вай тӀехьенна граждански бехктокхам дӀабовзийтар.
Гонахьарча наьха йоакхо еш, бераш дика кхетадора шоаш мел эшаш ба наха», - аьлар тхоца къамаьл даьчо.
Белгалду, ахкан зама латтача юкъа мехка дешархоша цу тайпара болх кхы а дӀабахьа лерхӀ.
