«Пост №1» яхача Ерригача Россе кхетаче дакъа лаьцар мехкарча дешархоша
Москве дӀахьош хиннача Ерригача Россе кхетаче дакъа лоацаш хилар ТӀой-Юртарча № 4 йолча ишколера къона эскархой-хьалхарбараш. Россе 89 моттигера 500 совгӀа саг гуллуш яр укх шерара из моттиг. Коталон Музея доазон тӀа дӀахьош хиннача тайп-тайпарча кхетаченашка дакъа лаьцар вай мехкарча дешархоша. Укхаза цар гойтар Даьхен истори шоашта мел довз, «Пост №1» хьалаца массахана кийча болга, герз леладе хар, иштта кхыдараш а. ХӀара доакъашхочун ший начӀал, говзал гойта аьттув болаш моттиг яр из.
«Къонача эскархошта, Хьалхарчар болам яхача оагӀон доакъашхошта мехка истори довзийташ, цунцара лерхӀам гойташ моттиг яр из», - дийцар «Сердалога» ийслагӀча классе дешаш йолча Тирканаькъан Аишас. Донбассерча тӀема операцена юкъе дакъа лоацаш ва йиӀига да.
Дешареи Ӏилмани гӀулакхех йолча Министерстве белгалдечох, «Пост №1» яха Даьхенцара безам чӀоагӀбарах йола кхетаче мехка истореца бувзам болча, «Шахьар-турпал», «ТӀема сийлен шахьар» яха лоархӀаме цӀераш лелаеча шахьарашка дӀакхухьаш я.
Укх тӀехьарча шерашка йоккхий кхетаченаш хиннай Тверь, Ржев, Волгоград, Санкт-Петербург, Тула яхача шахьарашка. Даьхе лораеш лаьттарий истореца бувзам бола моттигаш я уж.
Сийлахь-боккхача Даьймехка тӀема ханашца, СВО доакъашхошца ювзаенна я хӀара кхетаче. ХӀаьта цун керттера декхар- вай мехка истори доаржадар, кхувш латтачар дегашка Даьхенцара безам чӀоагӀбар.
