ГIалгIайчен дешархой Ерригроссийски фестивала доакъашхой хилар
«Iилма 0+» яха Ерригроссийски фестиваль дIайихьар ГIалгIай паччахьалкхен лорий университета даькъ тIа, цох сийрда, хIама довзара цIай хилар. Кхетаче дIаяхьарах къонача доакъашхошта дукха хIама дайзар. Цо хьадийллар ший тайпара дуне, доакъашхошта хьалха довзаш ца хинна, таханара Iилма гойтар, иштта хьалхадаьккхар мел лоархIаме ба лора болх.
«Фестивала чуйоагIаш тайп-тайпара майдаш вIашагIъехкаяр, цига дешархой тIаэцаш бар студенташ, ординатораш, университета хьехархой. Цар дийцар тIеххьарча хана лорий даькъ тIа хиннача кердача хувцамех, таронех, иштта жоп делар дуккхача хаттарашта.
Къаьстта мах болаш дар дешархой таро хилар, шоашта фу хов хьажа лорий новкъостала даькъ тIа. Цар гойтар цIий хьаэцара, хьалхара лорий новкъостал дара, маха боаккхаш чов тегара шоашта карагIдоалар», - аьлар «Сердало» газетага ГIалгIайчен дешара,Iилман Министерстве.
Дукхача дешархой таро хилар лорий профессега кхыча тайпара хьажа, шоай хургболча балха уйла е, хьалхара гIа баккха.
«Iилма 0+» дешархошта дукха хIама довзийтар, цар безам сомабаьккхар боккъонца дола Iилма Iомадара. Къаьстта царех, тахан парташ тIа багIарех, хургба кхоана дика говзанчаш - унахцIено, Iилма дегIадоаладеча шоашкара дакъа юкъедахьаш бола нах.
