Лорий йижарий цӀайца даькъалабийцар Инаркъерча дешархоша
Юртарча амбулаторе къахьегаш бола лорий йижарий цӀайца даькъала бувцаш хилар, Инаркъерча ишколера дешархой. Из хоам «Сердалога» бир «Бералла наькъаш» яхача ерригача Россе проекта зарбан болх лелабераша.
ХӀара дийнахьа унахошта гӀойле еш къахьегаш хьабоагӀаш бола лорий йижарий болча, баха хилар юртарча № 12 йолча ишкола дешархой, директора гӀонча хьалха йолаш. Россе къонача аьрзелгаша, хозача дешашца уж хьинар дола нах даькъала бувцаш, теркалдир цар болх мел лоархӀаме, бехктокхаме ба. Шоашкара совгӀаташ денна, дукхача шерашка могаш, маьрша, иразе болаш баха даькъалабийцар кхувш латтараша лорий йижарий.
«Цу наьха болх боккха, чӀоагӀа эшаш болга белгалдеш да из цӀай. Тахан ураотташ латта къона тӀехье из деррига кхетадеш, цар сий деш, баркал оалаш йолга дӀахайтар а лоархӀаме да», - дийцар «Бералла наькъаш» яхача проектага хьожаш волча Колой СаӀида.
