Ши саг ве гӏийртача зуламхочун гӏулакх тохкаш ба мехкарча Тохкама Комитета болхлой
43 шу даьннача мехкахочун духьала гӏулакх хьадийлла, болх дӏахьош ба Наьсарерча Тохкама оагӏон болхлой. РФ УК 3-ча даькъа 30 ст., п. «а», 2-ча даькъа 105 ст. бехктокхаме озаш ва из саг. Тохкама оагӏон болхлоша белгалдечох, ши саг ве лаьрхӏа кийчо яь хиннав из, бакъда лаьрхӏар кхоачашде аьттув баьннабац цун цхьацца бахьанех.
«Тохкама болх дӏахьош, гучадаьлар, дӏадахача шера наджгоанцхой бетта 16-ча дийнахьа Наьсарерча Малсаганаькъан О. цӏерах болча ураме латташ, шийна гоама хиннача шин сага герз детта волавеннав из. Лозабаьраш дарбанче ӏочубигаб цу миноте. Зуламхо къайлаваьнна дӏавахавар, федеральни оагӏонца лохаш вар из ӏаьдало. Ведда лийннар гучаваьлар, цун духьала гӏулакх хьадийлла болх дӏахьош ба тахан. Карарча хана ӏаьдала кара ва из», - дийцар «Сердалога» мехкарча Тохкама Комитете.
Цу зулама бахьанаш тохкаш, ма дарра из мишта хиннад хьожаш да ӏаьдал. Мехкарча СКР тохкама оагӏон кулгалхочо ше тӏахьожам беш дӏахьош ба из болх.
