«Са дог а са а - Гӏалгӏайчен гӏала» яха спектакль гойтаргья Гӏажарий-Юрта
Дукха ха йоацаш хинна «Са дог а са а - Гӏалгӏайчен гӏала» яха спектакль гойтарах Гӏалгӏайчен культуран вахара даькъ тӏа доккха, сийрда ди хилар. Из оттаяьй Гӏалгӏайчен кинон, театра, таханарча заман тароний Центро, дукхача наха еза а елар, дукха дӏайха дешаш аьлар цох. Къаман тӏехьален оагӏув цунца го таро хиларо наьха безам совбаьккхар. Из нахага цун керттера уйла дӏакхачийтара лоархӏаме гӏа ба. Хӏанз из исбахьален проект йовза таро йолаш ба Гӏажарий-Юрта бахархой, спектакль гойтаргья моттигерча культуран Цӏагӏа.
Дикача проекта чудоагӏаш да исторецара лерхӏам, эггара укх заман дикагӏа йола технологеш юкъеяьха хилар. Оаха доаккхал ду Къилбаседа Кавказа исторе хьалхара театра болх, аьнна, цӏи яла йиш йолаш, сага кхелла хьаькъал юкъедаьккха из хиларах», - яхаш дийцар «Сердало» газетага ЦТКиКИ зарбан болх лелабераша.
Белгала ма дарра, «Са дог а са а - Гӏалгӏайчен гӏала» - из я дукхача доакъоех вӏашагӏъелла культуран оагӏув. Гӏалгӏай къаман ӏадаташ, оамалаш сомайоал цу сцена тӏа. Къаман къаьнара, даьй ханашкара культура сомайоаккхаш, вахара керттера оагӏонаш гойташ, хӏара цунга хьожаш волча сага из гарга хургболаш хьакхелла болх ба из, - из ноахалгара ноахалга кхоачаш хьадоагӏаш да.
Гӏалгӏайче кораяьй кагирхошта дийна ӏадаташ довзара йола мах баь варгвоаца оагӏув, цунца чӏоагӏлу юкъара цхьа уйла хилар. Хӏара из спектакль мел гойтача хана, цо къаьстта из чӏоагӏдергда.
