Хьамсарча ишколе дешара Ди дездеш хилар Халкъа Гуллама кулгалхо
Халкъа Гуллама кулгалхо вола Тӏумхой Мухьмад, дешара Ди дездеш, ше деша ваьгӏача ишколе хилар. Наьсар-Кертерча № 1 йолча ишколе дӏайихьача лоархӏамеча, тов бетта 1-ча Ден хетаяьча кхетаче дакъа лоацаш вар из тахан. Дега безамца, йӏовхалца тӏаийцар беза хьаьший ишколе. Мехка Гимн дӏаоалаш дӏайолайир кхетаче. Дешара шу дӏадолалуча дийнахьа, Россе Паччахьалкхен байракх аййир цига.
«Лоархӏаме хьехархой, бераш! Тов бетта хьалхара ди шун массане дегашта ший тайпара да. Хьалхарча классе деша долхача берашта ший наӏараш хьайийллай ишколас, дешара оагӏон вахар довзийташ, хӏаьта боккхагӏбарашта хьалхашка доккхий декхараш латт – дийша баьнна арабоалаш вахаре шоаш дӏахохьоргбола никъ харжа безаш, дукхача хӏаман уйла е езаш ба уж хӏанззе. Иразах, беркатах, доккхача толамех, мехка хӏама тоадара тӏехьа долча гӏулакхех дизза хилда шоана ер керда дешара шу! Къонача тӏехьен нийсагӏа, беркатегӏа болча наькъ тӏа яла, къамах дог лазаш бола нах хинна ураотта гӏо деш латтарех да шо тахан, хьамсара хьехархой! Хӏаране дега тоам беш хилда ер дешара шу!» - аьлар Тӏумхой Мухьмада, кхетачен доакъашхошка къамаьл деш.
Белгалде деза, мехка дешара оагӏонцара гӏулакхаш тоаде гӏерташ, доккхий хувцамаш деш, тахан республикан кулгалхоша къахьегилга. Дешарца дувзаденнарашта лакха терко еш ба тахан мехка, хӏана аьлча царга хьежжа, къонача тӏехьен гӏулакхашка хьежжа хургья вай къаман кхоане. Паччахьалкхен программашка, къаман проекташка гӏолла дукха доккхий хувцамаш даьд мехка.
Моллагӏча моттиге дахаш долча бера таханарча ханага хьежжа йолча ишколе деша, ший начӏал лакхде, цхьацца говзал караерзае аьттув хургболаш; боккха болх ба мехка дӏабихьар, дӏахо кхы а къахьегаш латт цу лостамагӏа.
