«Россе низ» яхача спортивни боламо гулбир, ГӀалгӀайчера жӀакех ловза къонабараш
ГӀалгӀайчен Шолжа кхален ГӀажарий-Юрт дакъа лоацаш хилар «Россе низ» яхача спортивни болама юкъе. Кхален культуран ЦӀен даькъ тӀа дӀайихьар жӀакех ловзара яхьаш, цига дакъа лоацаш бар из ловзар дукха дезараш, цу тӀехьа хьаькъале уйла е ловраш. Яхьаш дӀахьош, бераша гойтар лакха кийчо, дика уйла дӀатӀайодаш хилар, котало яккхара тӀакхувш хилар. Царна лаьрхӀа мерзача хӀамай истол оттадаьдар из болх вӀашагӀбеллараша. Кхетачен чаккхе еш, лакхара моттиг яьккхар Хьаьшанаькъан Дауда, шоллагӀа моттиг Тебой Мухьаммада, кхоллагӀа моттиг Дзейтанаькъан Ӏаддала кхаьчар.
«Кхетаче дӀахьош дакъа лаьцар парте моттигерча отделене секретара Йовлой Мухьмада, моттигерча кхела кулгалхочо Ганенаькъан Мухьмада, хьалхарча даькъа секретара Матенаькъан Ӏайшата. Эггара чӀоагӀагӀа белгалйоалаш хинна моттиг яр цу юкъе тренер, дика хьехамча Темирханаькъан Саламхан хоаставар. Халкъашта юкъера шахматий ди долаш, лаьрххӀа баркал аьлар цунна. Из цун доагӀаш а дар, цо дукхача шерашка къахьегарах, лакха балха говзал йолаш цу спорта даькъ тӀа цо дукха нах Ӏомабарах. Цо кулгал деш, хьалкхеду дукха ноахалаш, керда начӀалаш», - аьлар «Сердало» газетага «ЦаӀ йолча Россе».
ХӀанзара яхь лаьрхӀа яр пайдане ловзар кхувш доагӀача ноахала юкъе доаржадара. Цу тайпара кхетаченаш эшаш я бераш хьаькъал долаш кхедара.
