Студенташа, СВО доакъашхошта, саг хьулавеш дола цхаралаш деш латт
Наьсарен кхален Тутайнаькъан Аьсета цӀерагӀча зӀамагӀа болча лорий колледжа студенташа хьинаре къахьег, Россе Донбасс лораеш дӀахьош йолча лаьрххӀача операцен доакъашхой хьаллоацаш. «Халкъа фронт. Деррига а Коталонна» яхача проекта чудоагӀаш, хургболча лораша хьулавеш дола цхаралаш ду, яхаш, дийцар «Сердало» газетага ГӀалгӀайчен Халкъа фронто.
«Наьсарен зӀамагӀа болча лорий колледжа студенташа, хьалхарча тӀема мугӀарашка латтача бӀухошта лаьрхӀа, цар кхерамзленна эггара чӀоагӀагӀа эшаш дола саг хьулаву цхаралаш деш латт.
Цар шоай дешар а кхыдола гӀулакхаш а тӀехьатетта, ха лехар, цу юкъарча гӀулакха юкъе, турпалхой хьаллоацаш, дакъа лаца.
Уж хӀанз болабеннаб цхаралий Ӏана кхоачам бе, уж а кастлуш дӀадохьийтаргда вай бӀухошта», -аьлар тха корреспондентага, ГӀалгӀай Республикан Халкъа фронта моттигерча штаба викала Барханой Фатимас.
ГӀалгӀайчен халкъа фронто хьалхадоаккх, «Халкъа фронт. Деррига Коталонна!» яхача мехка проекте дакъа лаца йиш йолаш ва моллагӀа а безам бар. Наьсарен-Шахьара доазон тӀарча Халкъа фронта исполкоме хьаийду СВО доакъашхошта лаьрхӀа дола гуманитарни новкъостал. Телефон: 8(8732) 22-27-99.
