Из хоам мехкадаьга Келаматанаькъан Махьмуд-Ӏаьлага бир токацарча гӀулакхах йолча министерствон кулгалхо волча Лоалахой Ахьмада», — йоах тхога бенача хоамо. Министра яхачох, «Шолжа-Шахьар — 110 Кв» яхача подстанце низ чӀоагӀбеш хургда из гӀулакх.

ООО «Снабэлектро» яхача моттигера ийцай трансформатор. Из эцара дош къоастадир укх бетта 25-ча дийнахьа, ахча дӀаденнад. Укх бетта 7-ча дийнахьа хьакхача езаш я трансформатор. Ерригача Шолжа районера токацара хьал меттадоаладеш хургья керда трансформатор.

Таханарча дийнахьа шахьаре 100 эзар совгӀа саг вах, 117 йоккхий паччахьалкхен болх-моттигаш я цига. Цу гӀулакха болча болхлоша яхачох, керда трансформатор Ӏооттаяь яргья цхьан кӀира.

«Шолжа-Шахьарерча бахархошка хало яр, хила боаггӀача боараме ток дӀакхоачаш цахиларах. Тишъенна къаьнара трансформатор лерттӀа болх беш йоаца дукха ха яр. Цу наха гӀо дар вай декхар да тахан. Лакхача боараме чакхбаккха беза из лоархӀаме болх», — аьлар Келаматанаькъан Махьмуд-Ӏаьлас. Мехкадас белгалдир, бокъо йоацача тайпара ток дӀатӀахеттаргйоацаш, дӀадала доагӀа ахча ханнахьа дӀателаргдолаш, бахархошца болх дӀакхахьа беза, аьнна.

Пайда эцача сердалах ахча ханнахьа наха дӀателаш хилча, тишъенна оатхалаш хувца аьттув хургба. Из кхетаде деза бахархоша. Шолжа-Шахьарера нах массехказа леткъабар Мехкадаьга, ток ца тоъаш хиларах, йоккхий халонаш токхаш дах тхо, аьнна.

Келаматанаькъан Махьмуд-Ӏаьлас республикан паччахьалкхенна тӀадиллар, из гӀулакх аттача даьккхе, дӀабихьача балхах дар шийга хайта, аьнна.