Республикера цӀихеза журналист яь ди дездеш я
Россе журналистий Союза доакъашхочоа, культуран цӀихезача болхлочоа, «КарагӀдаьннарех» яха орден еннача лакха начӀал долча журналиста Солтукенаькъан Зинайна хетабаь «Деша говзанча» яха гойтам хьабийллар МагӀалбикерча библиотеке. Таханарча журналистике лоархӀаме болхло я Зинаида. Дуккхача шерашка хьинаре къахьегаш, вай мехка санна мехкал арахьа а наха йовзаш, цӀи йоаккхаш болхло я из.
Журналиста тайп-тайпарча ханашкара вахара никъ бовзийташ ба шахьаре дӀахьош бола гойтам. Цига го йиш я цун сурташ, довза йиш я цо мел къахьийгад журналистике, ше йоаккхача хана.
Къаьстта лоархӀаме моттиг дӀалоацаш я гӀалгӀай паччахьалкхе кхоллара наькъах цо язъяь очеркаш, статьяш. Къаман вахаре лоархӀаме хиннача деноех яздеш хьаений из. Хьалха хиннача Нохч-ГӀалгӀайчен, ГӀалгӀайчен газеташ тӀа, журналаш тӀа арадийннад цун йоазош.
ГӀалгӀай паччахьалкхен телевиденеца цо бувзам лелабеча хана, ма дарра бӀаргадайра бахархошта из мел лакха начӀал долаш болхло я. Тахан хьабийллача гойтамах хоза масал хургда шоай балха тӀа лакхаленга кхача гӀерташ болча къонача журналисташта.
«Сердало» Кепайоазон цӀен болхлоша даькъалаювц Рамазана Зинаида яьча денца. Иразе, аьттонца, беркатаца, могаш-маьрша йолаш; яхийла из дуккхача шерашка!
