Университета студент хилар тӀема доакъашхо волча Йовлой Идрисах
Донбассе дӀахьош йолча тӀема операцен доакъашхо волча шоай студентах, Йовлой Идрисах дийцар гӀалгӀай паччахьалкхен университете. Сийдолаш тӀема никъ хьабена Идрис Денала орден луш белгалваьв, хӀаьта хӀанз, гӀалгӀай паччахьалкхен университете деша этта, ший дешар дӀаходахьа лаьрхӀад цо.
«ТӀема операци вай мехка исторецара лоархӀаме дакъа да. Вай массане Даьхенцара безам чӀоагӀбе безаш ха я ер, хӀаьта къаьстта чӀоагӀа лораде деза из тӀема юкъе болча бӀухоша. ХӀара денна майрал, денал гойташ латт вай къаман сийдола къонгаш. Деша отташ тхоай вуз харжарах доккха баркал оал оаха Йовлой Идриса. Берригача студенташта хоза масал да из, къаман денал дола воӀ», - дийцар «Сердало» газетага университета болхлоша.
Кагирхошка къамаьл деш, шоашта хьалхашкара декхараш дизза кхоачашдеш, Даьхен сий лорадеш, гӀалгӀай къамах хоза цӀи йоаккхийташ чакхбалара тӀахьийхар Идриса уж.
