Ӏаьлий-Юрта хьалъергья таханарча заман дарбанче, шийца поликлиника йолаш
2025 шу чакхдоалаш, Ӏаьлий-Юрта керда дарбанче хургья, шийца поликлиника а йолаш, цига 100 саг цхьан сменах тӀаэца йиш хургья. Цох хоам бир ГӀалгӀай республикан Кулгалхочун,Паччахьалкхен зарбан болх лелабераша.
Ӏалий-Юртара ФАП таханарча заман хьалаш чудолаш яц, технически оагӀонга диллача. Керда дарбанчен доазув 2000 кв. метр гаргга да, таханарча заман хьалаш а долаш, цу юкъе терапевта, хирурга, педиатра, физиотерапе, рентгенографе кабинеташ а йолаш.
ГӀалгӀайчен Кулгалхочо Келаматанаькъан Махьмуд-Ӏаьлас белгалдир, мехка кулгалхоша шоашта хьалхашка латта декхараш кхоачашду лорий хьалаш хьакхоллара, уж нахага дӀакхоачаш хилийтара къахьег.
«Цо таро лургья аргӀанара нах лорашка чакхбаха, лазар юххьанцахьа гучадаккха, иштта тайп-тайпарча лазарашта дарба де», - аьлар мехка кулгалхочо.
Из гӀишло хьалъеш я «УнахцӀенон хьалхара мугӀараш тоадара» яхача федеральни проекта, «УнахцӀено» яхача къаман проекта чуйоагӀаш.
