Дикача гӀулакхий дийнахьа, ГӏалгӀайчен культуран болхлоша сомий гаьнаш дӀаегӏар
Дерригача дунен дикача гӀулакхий ди долаш, МагӀалбика кхален культуран-салоӀама центра болхлоша дӀабихьар экологически болам. Цу дикача гӀулакхе дакъа лаца гулбелар кхаь юртара нах - СоагӀапчара, Инаркъера, Дабе-Юртара. Керттера дӀабихьа болх бар 36 сомий га дӀайогӏар моттигашкарча культуран Цӏеной доакъош тӀа.
«Цига вийха хиннача говзанчас-беш лелаярхочо наха хьалхадаьккхар гаьнаш мишта дӀае еза, уж дикагӀа дӏалатара эшар фуд», - аьлар «Сердало» газетага МагӀалбика кхален КДЦ.
Боламо хьагойтар, из санна долча дикача гӀулакха юкъе, шоашкара дакъа юкъе да безам бараш вай дукха болга. Цунца тоалу вайна гонахьара Ӏалам, хозлу доазонаш.
Хӏара га дӀайогӀар - из бехктокхаме хилар да тӀехьа тӀабоагӀарашта хьалхашка, цунца гойт шоай хьамсарча лаьттан дикала уйла еш хилар.
