«ЖӀайрахь-Ӏарамхи» машина никъ тоабеш латт
ЖӀайрахьа кхале, овсаре къахьегаш, тоабеш латт «ЖӀайрахь-Ӏарамхи» машина никъ. Ши километр бӀаьха никъ беха бар, из тоабе беза ха тӀехъяьннаяр. Ше цкъа цига ваха воагӀаш, Кулгалхочо теркалйир из моттиг, яхаш, дувц «Сердало» газетага ГӀалгӀайчен Кулгалхочун зарбан болх лелабераша.
«Из никъ лоархӀаме ба, хӀана аьлча ши юрт ЖӀайрахь, Ӏарамхи вӀашагӀхотташ ба из, цул совгӀа, туристически комплекса тӀабодаш ба. Из тоабар туристашта эшаш хинна а ца Ӏеш, цига бахача наха а эшаш да, наьха вахара хьалаш тоадара ца хилча даргдоацар а да. ГӀалгӀайче массаза хиннай бӀарг тӀаотташ Ӏалама хозленаш йолаш, даим цига туристаш тӀалатташ, хӀаьта къаьстта из кхале нах салаӀа дукхагӀа ухарех я. Из деррига а чулоацаш, лаьрхӀар капитальни балхаш де», - йоах лаьрххӀача хоамо.
ХӀанз укх сахьате, болхлой асфальт Ӏобуллаш ба, никъ кӀезига шербергба: шоралла 6 метр хиллал хургба из, цо таро хулийтаргья машинашта паргӀатагӀа лела, цул совгӀа машинашца боагӀача водителашта новкъарле еш йола моттигаш а юстарйоахаргья, наькъа йистош лораеш дола аьшкабетона бӀоагӀий а ӀодогӀаргда.
ХӀанз ЖӀайрахьа кхален машина наькъашкара хьал тоадаь хургда, иштта кхераме а хургдац хьалха санна наха а туристашта а.
