Лоаман моттигашкарча Дошхьакълой элгацах дийцар мехка
Дошхьакълой элгацах дийцар Жӏайрахьа-Ахабоарзен паччахьалкхен ӏалама музея кулгал деча Сампенаькъан Ахьмадхана. Дошхьакъле яхача гӏалай юрта хиннай из моттиг. Мехка истореца лоархӏаме дола юкъерча бӏаьшерен сийленг да из. Чхарацара элгац эггара хьалха гучадаьккхар цӏихеза археолог Мужухой Б.М. вар 1979-1980-ча шерашка.
Цу хана хилар цига археологически тохкамаш а. «Готта моттигаш йолча хьалдаь хиннад элгац. Чхарах дӏахетта кхо камера йолаш хиннад из. Цхьаькха а цхьа йоккха моттиг я цох дӏахетта. Карарча хана-м кӏалхара кӏийле мара хӏама дисадац цох. «Дзурдзуки» ИГО кулгал деча Гӏогӏанаькъан Йоакъапа белгалдир, из санна йола моттиг Маьтлоама тӏа а йолга. Чухьанахьа тӏехкаш, хьайбай муӏаш я цига. Пенаш дикка шера дар, къайленаш а йолаш. Тӏера тхов боацаш ба, моттиг ше а нийсса ах хаьрца я», - дийцар «Сердалога» Сампенаькъан Ахьмадхана.
Къаьнарча ханаца бувзам бараш лорадеш, царна тӏахьожам лоаттабеш болх бу музее. Дошхьакълой элгац ӏилманхоша, иштта Кавказа истори тохкачар теркам беш моттиг я.
