ГӏалгӀайчен искусствон колледже керттера халонаш йийцар
ГӏалгӀайчен Паччахьалкхен искусствон колледже, яьржа хьехархой кхетаче дӀайихьар, ГӏалгӀайчен культуран Министерствон кулгалхоша дакъа а лоацаш. Из кхетаче дӀаяхьар тӀадилладар республикан культуран, туризма министр йолча Лаьнанаькъан Залинас. Дешара моттига лоархӀаме хаттараш дувцача дакъа лоацаш хилар министра гӀонча Куртой Макка.
«Кхетаче дӀахьош колледжа кулгалхочо Пхьиленаькъан Ӏийсас дувца оттадир массехк лоархӀаме хаттар. Кулгалхоша яхачох, уж да кхы тӀехьа ца тетташ, кхоачашде деза гӏулакхаш, хӏана аьлча уж Ӏаткъаш да дешара оагӀонна. Геттара ира латтача дешаех дар дешархой кӀезига хилар, сцена тӀа лелаю костюмаш кхоачам боацаш хилар. Из да керда студенташ юкъебахара болх дӀабахьа безилга. ӏалашон хьал а кердадаккха дезаш да, хӀана аьлча кхоачам боллаш профессиональни гӀирс ца хилча, концерта йоагӀаш йола кийчо е таро хилац.
Автопарк а кердаяккха езаш я, из ца хилча кхыча мехкий, ерригроссийски яхьашка, фестивалашка дакъа лаца таро хилац», - аьлар «Сердало» газетага искусствон колледже.
Культуран, туризма министра Лаьнанаькъан Залинас уж кхоачамбоацараш ший теркаме ийцар. Цо белгалдир, Паччахьалкхен искусствон колледж, республикан кхоллама кадраш хьакхоллара эшаш хилар, иштта студенташта дика хьалаш хьакхоллар керттера декхар да. Министра колледжа болхлой тешабир; белгадаь хаттараш лоаццача хана министерствон говзанчаша, дӀахо уж кхоачашдара, тохкаргда, аьнна.
