Дикка йоаржаеш латт вай мехка кагирхой политика
Кагирхой политика йоаржаеш, къахьегаш ба вай республике. Цу гӀулакхах йола аргӀанара кхетаче дӀайихьар селхан кагирхой парламенте. ВМСМ болх дӀаболабаьча дийнахьа денз, кхоачашде аьттув баьннача лоархӀамедарех дийцар цига цу оагӀон хьалхалаттача Оздой Инала. Из хоам «Сердало» газетага бир цу моттигера.
«Хьинаре къахьегаш, дӀадахар хьалхара шу. ДӀайихьар «ГӀалгӀай мотт йовхьамашца, дешашца яха яхьаш», «Рамадан Мубарак» яха бусалба дин викторина, «Кхераме йоаца кхоане» яха наркоманен духьалара форум, иштта кхыйола кхетаченаш.
ЛоархӀамечарех хилар тхона Сурхо тӀарча ветераний цӀенца, берий могашал меттаоттаеча моттигаца, цхьацца хӀама хьадеш йолча предприятешца бувзам оттабар. 2023-ча шера ВМСМ 80 дика гӀулакх даьд, 16 саг балха оттаваьв», - белгалдир Оздой Инала.
Гулбеннача хьаьшашта совгӀаташ луш, дика толамаш даьхараш белгалбеш, чакхъяьлар кхетаче.
