«ХӀанз тоадаьча Оздой урамагӀа долча кашамашта гонахьа керда карт яьй. Цул совгӀа, кашамашта чура доазув а, иштта цига хьабоагӀаш бола никъ а тоабаьб. Эшаш бола гӀирс чулелабе йоккха йоаца гӀишло а хьалъяьй. Моттигерча бахархоша дика зувш да уж хувцамаш, цудухьа дукха нах боагӀа укхаза баркал ала, шоашкара цу тайпара болх бе вӀаштӀехьадаргдоацилга кхета а деш», - аьлар хоамо.

Уж доацаш а, Кирова урамагӀа дола кашамаш тоадаь даьннад. Цар 4 гектар лаьтта дӀалоацар, царна гонахьа карт яьй, эшаш бола гӀирс чулелабе гӀишло хьалъяьй, йӀовхал а чуйилла.

Из проект мехка кулгалхочо Келаматанаькъан Махьмуд-Ӏаьлас, «Сафмар» яхача дикача гӀулакхий ганза кулгалхочо Гуцаранаькъан Микаила баьча бартах дӀахьош я. Кашамаш тоадеш мел долча, лаьттан хьал а теркалду, иштта бахархошта фу хет а хьож. Хидиранаькъан урамагӀа дола кашамаш юрта эггара къаьнагӀдарех да. Моттигерча бахархоша белгалду; уж кашамаш эггара чӀоагӀагӀа кердадаха дезаш хиннарех дар, яхаш. Болхлоша деррига дика кхоачашдаьд, бахархой раьза ба цу гӀулакха.

Иштта Осканаькъан урамагӀа дола кашамаш а тоадир, вешта аьлча, юртара кашамаш дерригаш а тодаь даьннад.

Белгалду, ер шу йистедоалаш, 40 кашамаш тоадаь даха лерхӀ, царех 33 бусалба наьха, 7 кераста наьха да. ХӀанз дӀахьош долча балхашка хьежача, ала йиш йолаш да; лаьрхӀача ханал хьалха уж йистедоахаргда, аьнна.