Акха дивизерча гӀалгӀай полка хиннача байракха кеп хургья вай музее
Кавказерча туземни дошлой дивизен 110 шу дизара хетаяь кхетаче дӀахьоча дийнахьа, паччахьалкхен музея болхлошка дӀаелар из Санкт-Петербургерча ГӀалгӀайчен викалаша.Республикерча музее хургья Акха дивизе хиннача гӀалгӀай полка байракха кеп. Вайна массанена ховш да, цу дивизе дунен Хьалхара тӀом болча хана, йоккха майрал гойталга.
«Ерригача Россе юкъара «Россе эпсараш» яха моттиг яр из кхетаче дӀахьош хиннар. Укхаза гулбеннабар Санкт-Петербургера Ӏаьдала болхлой, тайп-тайпарча юкъарча моттигашкара викалаш, иштта кхыбараш. Акхача дивизен истори довзийташ дола каьхаташ, сурташ, видеогойтамаш довзийтар проекта Ӏилман болхлоша. ГӀалгӀай дошлой полка хетаяь яр къаьстта цхьа доклад. ГӀалгӀай къаман къонгий майралах, деналах дувцаш бола болх кӀоарга чулоацам болаш бар», - дийцар «Сердало» газетага Миннаце.
Россе бокъонаш лораеш, шоай синош ца кходеш, тӀехьа тӀабоагӀарий вахара денош маьрша хилийта гӀерташ, лаьттаб вай сийдола къонгаш. Цар гойта турпала истори даха дисад дуккхача бӀаьшерашка. Вай декхар да, тӀехьа тӀайоагӀача хана ураоттарашта из деррига дӀадовзийта, масал эцийта.
