Боккхийча наьха, заӀапхой хьашташ дика кхоачашду
ГӏалгӀай мехка, 2023 шера денз, дӀахьош ба боккхийча нахага, заӀапхошка хьажара керда вӀашагӀбелла болх, яхаш, дийцар ГӏалгӀайчен Кулгалхочо Келаматанаькъан Махьмуд-Ӏаьлас.
«ДоккхагӀа дола ноахал» яха федеральни оагӀорахьара могаяь проект, иштта «ДегӀаахар» яха къаман проект дӀаяхьаро тӀахьех доккхагӀа долча ноахала вахара хьал аттача даккхара. Из гӀулакх леладеш я моттигашкара ялх, мехкара цаӀ болх лелабеш йола центраш. Цо таро хилийтар цу даькъ тӀара болх боаржабе 14% совгӀа.
Къаьстта терко лоаттаю лаьрххӀача тӀема операце доакъашхошта, цар даьшта, иштта цхьаь бахача наха, геттара чӀоагӀа новкъостал эшаш барашта. Цу наха хьалхарча аргӀагӀа гӀо ду.
«ЛоархӀаме да кхетадеш хилар, дукхача хана тӀехьахьожаш дӀахьош бола болх - из духхьал вахара хьалаш хинна Ӏац. Из уж нах хьаллацара лаьрххӀа дола новкъостал да. Тхона гуш да, проект эшаш хилар, цудухьа оаха из дӀахо а дегӀайоалаергья, из новкъостал эшача наха кхы а дукхагӀа гӀо дар, терко лоаттаяр духьа», - аьлар мехка Кулгалхочо.
